Stjórn fiskveiða
418. mál á 151. löggjafarþingi.
Sjávarútvegs- og landbúnaðarráðherra.
Markmið
Að tryggja betur byggðafestu og nýliðun í sjávarútvegi.Helstu breytingar og nýjungar
Lagðar eru til breytingar á lögunum hvað snertir byggðakvóta, strandveiðar, bætur, línuívilnun o.fl. Lagt er til að ákvæði um nýtingu 5,3% aflaheimilda til sérstakra aðgerða, sem nú er að finna í ýmsum greinum laga um stjórn fiskveiða, verði dregin saman í einn kafla í lögunum og skapaður skýrari grundvöllur undir nýtingu þeirra og meðferð en nú er. Þá er lagt til að kveðið verði á um föst innbyrðis hlutföll í ráðstöfun umræddra 5,3% aflaheimilda milli einstakra verkefna og að þau hlutföll byggist á ráðstöfun til einstakra aðgerða fyrir fiskveiðiárið 2019–2020. Lagt er til að við úthlutun byggðakvóta verði lögð áhersla á stuðning við dreifðar sjávarbyggðir. Þannig verði föstu hlutfalli almenns byggðakvóta úthlutað til einstakra byggðarlaga árlega og byggi sú úthlutun á meðaltalsúthlutun fyrri ára á byggðakvóta. Þá er gert ráð fyrir að heimilt verði að ráðstafa aflaheimildum almenns byggðakvóta byggðarlags, samkvæmt beiðni sveitarstjórnar, að hluta eða í heild, til verkefna varðandi sértækan byggðakvóta og til tilraunaverkefna til byggðaþróunar. Einnig er lagt til að ónýtt hlutfall línuívilnunar á hverju þriggja mánaða tímabili færist sem viðbót við almennan byggðakvóta. Því verði síðan skipt milli sjávarbyggða í samræmi við hlutdeild þeirra í löndun línuívilnunar miðað við meðaltal undanfarinna ára.
Breytingar á lögum og tengd mál
Lög um stjórn fiskveiða, nr. 116/2006.Kostnaður og tekjur
Ekki er gert ráð fyrir áhrifum á ríkissjóð.Afgreiðsla
Frumvarpið var ekki afgreitt úr nefnd.Aðrar upplýsingar
Skýrsla starfshóps um 5,3% aflaheimildir. Atvinnuvega- og nýsköpunarráðuneytið, 21. febrúar 2020.
