Ferill 657. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 1306 — 657. mál.
Síðari umræða.
Nefndarálit
um tillögu til þingsályktunar um staðfestingu ákvörðunar sameiginlegu EES-nefndarinnar nr. 64/2018 um breytingu á IX. viðauka (Fjármálaþjónusta) við EES-samninginn.
Frá utanríkismálanefnd.
Nefndin hefur fjallað um málið og fengið á sinn fund Pétur Gunnarsson frá utanríkisráðuneyti og Ernu Hjaltested, Gunnlaug Helgason og Mörtu Margréti Rúnarsdóttur frá fjármála- og efnahagsráðuneyti.
Með tillögunni er leitað heimildar Alþingis til að staðfesta ákvörðun sameiginlegu EES-nefndarinnar nr. 64/2018 frá 23. mars 2018 um breytingu á IX. viðauka (Fjármálaþjónusta) við EES-samninginn frá 2. maí 1992 og að fella inn í samninginn eftirtaldar gerðir:
1. Reglugerð Evrópuþingsins og ráðsins (ESB) nr. 345/2013 frá 17. apríl 2013 um evrópska áhættufjármagnssjóði.
2. Reglugerð Evrópuþingsins og ráðsins (ESB) nr. 346/2013 frá 17. apríl 2013 um evrópska félagslega framtakssjóði.
3. Framkvæmdarreglugerð framkvæmdastjórnarinnar (ESB) nr. 593/2014 frá 3. júní 2014 um tæknilega framkvæmdarstaðla að því er varðar form tilkynninga skv. 1. mgr. 16. gr. reglugerðar Evrópuþingsins og ráðsins (ESB) nr. 345/2013 um evrópska áhættufjármagnssjóði.
4. Framkvæmdarreglugerð framkvæmdastjórnarinnar (ESB) nr. 594/2014 frá 3. júní 2014 um tæknilega framkvæmdarstaðla að því er varðar form tilkynninga skv. 1. mgr. 17. gr. reglugerðar Evrópuþingsins og ráðsins (ESB) nr. 346/2013 um evrópska félagslega framtakssjóði.
Sex mánaða frestur samkvæmt EES-samningnum til að aflétta stjórnskipulegum fyrirvara var veittur til 24. september 2019. Framsetning tillögunnar telst að mati nefndarinnar í samræmi við 7. gr. reglna um þinglega meðferð EES-mála.
Með reglugerðum (ESB) nr. 345/2013 og 346/2013 er komið á samræmdu regluverki um evrópska félagslega framtakssjóði og áhættufjármagnssjóði. Markmið reglugerðar (ESB) nr. 345/2013 er að stuðla að vexti og nýsköpun lítilla og meðalstórra fyrirtækja á Evrópska efnahagssvæðinu. Þá er markmið reglugerðar (ESB) nr. 346/2013 að auðvelda fjárfestum sem vilja fjárfesta í fyrirtækjum með félagsleg markmið að finna og velja evrópska félagslega framtakssjóði.
Reglugerðir (ESB) nr. 593/2014 og 594/2014 kveða á um nánari útfærslu á reglugerðum (ESB) nr. 345/2013 og 346/2013 og mæla fyrir um form tilkynninga eftirlitsstjórnvalds heimaaðildarríkis evrópsks áhættufjármagnssjóðs til eftirlitsstjórnvalds í gistiríki, á milli eftirlitsstjórnvalda og frá eftirlitsstjórnvaldi til Evrópsku verðbréfamarkaðseftirlitsstofnunarinnar (ESMA).
Innleiðing reglugerðanna kallar á lagabreytingar og er gert ráð fyrir að fjármála- og efnahagsráðherra leggi á komandi löggjafarþingi fram frumvarp til innleiðingar.
Nefndin leggur til að tillagan verði samþykkt.
Alþingi, 3. apríl 2019.
Áslaug Arna Sigurbjörnsdóttir, form. |
Logi Einarsson, frsm. | Ari Trausti Guðmundsson. |
Bryndís Haraldsdóttir. | Gunnar Bragi Sveinsson. | Rósa Björk Brynjólfsdóttir. |
Silja Dögg Gunnarsdóttir. | Smári McCarthy. | Þorgerður K. Gunnarsdóttir. |