Ferill 275. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 486 — 275. mál.
Síðari umræða.
Nefndarálit
um tillögu til þingsályktunar um fullgildingu heildarsamnings um efnahagslega samvinnu milli EFTA-ríkjanna og Indónesíu.
Frá utanríkismálanefnd.
Nefndin hefur fjallað um málið og fengið á sinn fund Kristin F. Árnason og Ögmund Hrafn Magnússon frá utanríkisráðuneyti.
Með tillögunni er leitað heimildar Alþingis til fullgildingar á fríverslunarsamningi milli EFTA-ríkjanna og Indónesíu sem undirritaður var í Jakarta 16. desember 2018.
Í greinargerð með tillögunni kemur fram að samningurinn tryggi Íslandi víðtækan tollfrjálsan markaðsaðgang fyrir allar helstu útflutningsvörur Íslands. Í samningnum er m.a. kveðið á um vöruviðskipti, þjónustuviðskipti, fjárfestingar, verndun hugverkaréttinda, opinber innkaup, samkeppni, viðskipti og sjálfbæra þróun, auk hefðbundinna ákvæða um sameiginlega nefnd og lausn deilumála.
Þá kemur fram í greinargerð að útflutningur frá Íslandi til Indónesíu nam 175 millj. kr. á árinu 2018. Er þar aðallega um að ræða útflutning á sjávarafurðum. Innflutningur frá Indónesíu sama ár nam 1.274 millj. kr. Er þar að mestu um að ræða innflutning á raftækjum, skóm og fatnaði. Íslensk fyrirtæki hafa jafnframt selt tækniþekkingu á sviði jarðvarma í Indónesíu.
Nefndin leggur til að tillagan verði samþykkt.
Logi Einarsson, Rósa Björk Brynjólfsdóttir og Þorgerður K. Gunnarsdóttir voru fjarverandi við afgreiðslu málsins.
Alþingi, 13. nóvember 2019.
| Sigríður Á. Andersen, form. |
Smári McCarthy, frsm. |
Ari Trausti Guðmundsson. |
| Bryndís Haraldsdóttir. | Gunnar Bragi Sveinsson. | Silja Dögg Gunnarsdóttir. |
