Samskipta- og alþjóðasvið

Hlutverk samskipta- og alþjóðasviðs er að annast ytri samskipti Alþingis, jafnt innan lands sem á alþjóðavettvangi. Starfsfólk sviðsins starfar í tveimur deildum, almannatengslum og alþjóðadeild.

Almannatengsl hafa umsjón með leiðsögn gesta um hús Alþingis, sinna rekstri Skólaþings og fræðslustarfi á öllum skólastigum, halda utan um rafræna miðla Alþingis, svo sem vef og samfélagsmiðla, ásamt því að annast viðburðahald á vegum þingsins. Jafnframt sjá almannatengsl um samskipti við fjölmiðla, svörun fyrirspurna frá almenningi og útgáfu kynningarefnis um Alþingi.

Alþjóðadeild veitir forseta Alþingis, alþjóðanefndum og utanríkismálanefnd faglega aðstoð í utanríkismálum og alþjóðastarfi. Í því felst m.a. undirbúningur fyrir þátttöku í reglulegu alþjóðastarfi þingforseta og í þeim átta alþjóðlegu þingmannasamtökum sem Alþingi er aðili að auk skipulagningar alþjóðlegra þingmannafunda sem haldnir eru á Íslandi og heimsókna erlendra gesta.

Starfsfólk samskipta- og alþjóðasviðs hefur aðsetur í Skúlahúsi, Kirkjustræti 4.