Þingfunda- og útgáfusvið

Hlutverk þingfunda- og útgáfusviðs er að annast undirbúning og framkvæmd þingfunda, vinna að útgáfu á umræðum í þingsal og uppsetningu og útgáfu á þingskjölum og lögum. Þá er haldið utan um inntöku varaþingmanna og hagsmunaskráningu. Starfsfólk þingfunda- og útgáfusviðs starfar í tveimur deildum, þingfundadeild og útgáfudeild.

Þingfundadeild annast m.a. gerð og birtingu dagskrár þingfunda, skráningu þingskjala og upptöku og útsendingu umræðna á þingfundum. Þá hefur deildin umsjón með mælendaskrá við umræður, atkvæðagreiðslum og lagaskráningu. Þingfundadeild annast einnig upplýsingaþjónustu við þingmenn á þingfundum og ráðgjöf og aðstoð við gerð og frágang fyrirspurna og skýrslubeiðna.

Útgáfudeild annast yfirlestur, uppsetningu og útgáfu á þingskjölum og lögum á prenti og á vef. Þá vinnur deildin að útgáfu á umræðum í þingsal. Útgáfudeild annast einnig uppfærslu og útgáfu lagasafnsins á vef Alþingis og útgáfu Alþingistíðinda auk þess að leiða stafræna þróun hjá skrifstofunni.

Þingfundadeild er með aðsetur á 2. og 3. hæð í Alþingishúsinu og útgáfudeild er á 2. og 3. hæð í Skjaldbreið og 3. hæð í Blöndahlshúsi við Kirkjustræti 8a og 8b.